Pake Lekun, esaterako, lau ikastaro antolatu dituzte: pintura, orratz lanak, yoga eta dantza. "Normalean, sei bat lagun edo apuntatu ohi dira ikastaro horietara eta horregatik erabaki dugu horiekin hastea datorren hilabetean. Pena barruraino sartuta dute askok eta bizitasun apur bat behar dugu denok. Horretan laguntzeko bada ere antolatu ditugu. Noski, segurtasun neurri guztiak hartuta egingo dira ikastaro horiek. Distantziak mantenduko dira eta norberak bere materiala eraman beharko du, ezingo da ezer elkarbanatu", dio Pake Lekuko zuzendaritza taldean dagoen Anton Umerezek.
Lau ikastaro antolatu arren, beste makina bat bertan behera utzita dutela gaineratu du Umerezek: "Ez bakarrik ikastaroak, abesbatzak ere ez du entseatzen, esaterako, bingorik ere ez da egiten, ezta hitzaldirik ere, eta irteera guztiak suspendituta daude, noski".
Urrian hasiko dira
Lagun Lekun bizi duten egoera ere antzekoa da. Lokala itxita dute oraindik eta ez dakite noiz zabalduko duten. "Askok dute gogoa zabaltzeko, topaleku hori faltan igartzen dute. Baina beste batzuek garbi dute hobeto dagoela itxita. Ez da erraza egoera ulertzea eta erabakiak hartzea. Edukiera mugatua izango luke lokalak eta lehen baino gutxiago sartu ahal izango ginateke. Bestalde, batzuek, esaterako, kartetan egiteko ohitura badute, baina orain hori ere ezin da lehen bezala egin. Zaila da, bai. Hemen, baina, yoga egiten hasi gara batzuk eta urrirako ingeleseko eta joskintzako ikastaroak martxan jartzea pentsatu dugu. Egoeraren arabera joango gara gauza gehiago antolatzen", dio Lagun Lekuko kide Marilo Un-zurrunzagak.
Izena eman behar da
Erretiratuen elkarte batean zein bestean datorren hilabetean hasi gura dituzte ikastaroak, baina jendea apuntatu ahala hasiko dira margotzen, josten edo ingelesa ikasten. Dena dela, edukiera mugak eta distantziak mantendu beharra kontuan hartuta, komeni da izena aurrez ematea, taldeak hamarrekoak izan ahal direlako, gehienera.