Parrokiak hartuko ditu dantzariak eta txistulariak

Maialen Santos 2020ko eka. 12a, 13:15

Oñatz dantza taldearen 50. urteurrenaren baitako Corpus Eguna "berezia" izango da. Prozesioaren faltan, dantzariak eliza barruan arituko dira, ezinbestean. Aita Madina taldeko txistularientzat ere hitzordu garrantzitsu bezain kuttuna izango da domekakoa.

Corpus Eguneko prozesioaren faltan, Oñatz dantza taldeko dantzariak elizan bakarrik arituko dira aurten. Eukaristiaren bedeinkapenaren ostean banakoa dantzatuko dute, eta gero, Aita Madina taldeko txistulariek Agur Jaunak kanta joko dute. Oñatz dantza taldeko arduradun Jesus Irizar Txutxin-ek azaldu duenez, amaieran ere egingo dute dantza: "Zortzikoa dantzatuz denak batera joango dira sakristiara".

50. urteurrenaren baitan

Oñatz dantza taldearen 50. urteurrena ospatzen ari dira aurten, eta, horren harira, corpusak ere "bereziak" izatea gura lukete taldekoek. Osasun krisiak, baina, aurreikuspenak bertan behera utzi ditu, eta elizan dantza egitearekin "konformatu" beharko dutela adierazi du Irizarrek. Hala eta guztiz ere, aurtengo corpusak "ezohikoak" izan arren, berezitik ere izango dutela uste du Mikel Biain dantzarien kapitainak –dantzari urdina–. Berak aitortu duenez, elizan ere igartzen dute tentsio puntu bat: "Eskaileretan aldarera begira gaudenean, elizako begirada guztiak izaten ditugu gainean". Alazne Agirre dantzaria hirugarrenez ari da corpusetarako entseatzen, eta "gogotsu" azaldu da aurtengoetarako. Oñatzeko emakumezkoek duela hiru urte dantzatu zituzten lehenbizikoz Oñatiko Corpus dantzak, eta aurten ere dantzan aritzeko "gogotsu" azaldu da. Aitortu duenez, herrian zein taldean "ondo" hartu dituzte emakumezkoak, eta gaur egun bereizkeriarik egin gabe egiten dute dantza: "Dagoeneko ez gara emakume edo gizonezko dantzariak; Oñatzeko dantzariak baizik".

Dantzariek euren lana egin dezaten, ezinbesteko dituzte Aita Madina taldeko txistulariak. Azken hauen egutegian ere Corpus Eguna ez da edonolakoa, Lander Diaz de Gereñuren iritziz: "Urteko hitzordu garrantzitsuenetakoa dugu honako hau". Bide batez, eskerrak eman gura izan dizkie aurtengoak antolatzen aritu direnei: "Lan handia egin dute, herriak bere jai kuttuna ospatzeko aukera izan dezan".

Aita Madina txistulari taldea.

XV. mendea ezkero dantzan

XV. mendean ere egiten ziren Corpus dantzak, "dokumentu batek jasotzen baitu dantzariei eta txistulariei ordaindu egiten zietela". Azken ehun urteetan dantzak ez dira aldatu; bai, ordea, jantziak. Txapela duela 150 urtekoa da, eta gorbatak eta prakak garaira "egokituz" joan dira.

Taldearen "nortasunaren parte" dira Corpus dantzak; horiek mantendu eta "belaunaldiz belaunaldi" transmititzea dute helburu. Dantzok munduari bira eman diote azken 50 urteetan; Poloniara, Belgikara, Kroaziara, Ameriketako Estatu Batuetara... eraman dituzte dantzariek.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak