Idoia Lazpitak azaldu duenez, kontsulta eta dei asko izan dituzte udaltzainen bulegoan, umeekin kalera joateko bete behar diren neurrien inguruko zalantzak argitzeko. "Galdetu digute, adibidez, ea bizikletan atera daitezkeen familiako kide guztiak edo 200 metro gehiago egin ahal izango dituzten aita-jaun-amandreak ikusteko".
Kalean ikusi dituzten arau-hausteak ez direla larriak izan gaineratu du, eta ez direla asko izan: "Adibidez, plazako frontoian ikusi genituen bi familia eta umeak elkarrekin jolasten, eta hori ezin zela egin esan genien. Berdin familia bereko kide guztiak batera zihoazela konturatzean ere". Astean egin dute asteburuko gertaeren inguruko balorazioa, eta "uste baino askoz hobeto" joan zela dio Lazpitak. "Lan pedagogikoa egiten dugu. Ez dugu larritasun handiko egoerarik izan eta isunik ere ez dugu jarri".
Dekretuaren arabera, kirol guneetan oraindik ezin da jolastu, eta, udaltzainek frontoia jolasleku moduan hartzen badute ere, Olakuako kirol gunean, esaterako, ateak –porteriak– prezintatu egin dituzte, ez erabiltzeko. Baita iturriak ere. "Umeek asko erabiltzen dituzte, eta kutsadurak ekiditeko neurria izan da hori", dio udaltzainburuak.
