Eragile askoren artean osatutako egitaraua prestatu dute aurten ere Martxoak 8 eguna ospatzeko. Eta denetariko ekintzak antolatu dituzte, hitzaldiak, antzezlana, elkarretaratzea, film emanaldiak edo Bortxatzailea zu zara performancea, adibidez.
Koreografia prestatzen
Martxoak 8 egunean egingo dute, hain justu, koreografia hori herriko plazan, 13:00etan. Elkarretaratzearekin batera egingo dute; "Indarra ikusiko da ekintza horretan", dio sare feministako kide batek. Aurreko astean egin zuten lehen entsegua, Eltzian. Hainbat emakume elkartu ziren, gazte asko tartean, eta musikaren eta bideoen laguntzarekin, joan den urtean Txileko Valparaiso hirian sortu eta harrezkero munduko toki askotara heldu den Bortxatzailea zu zara koreografia prestatzen aritu ziren. Euretako bat aurrean gidari lanak egiten jarri eta ari jarraituz egin zuten entsegua.
Gaur, martxoak 3, da hurrengo entsegua eta herriko emakume guztiak daude gonbidatuta; Eltzian izango da, 20:00etan. Azken entsegua zapatu arratsaldea egingo dute.
