1970tik 2020ra
Julen Agirre, Oñatzeko kideak azaldu bezala, 50 urte hauetako ezaugarri nagusia transmisioa litzateke. Izan ere, belaunaldiz belaunaldi, taldeko kideen artean dantzak transmititzen joan dira gaur egun arte. Horrekin batera, 50. urteurrenaren hiru helburuak azaldu ditu Agirrek: "Lehen helburua gure nortasuna hauspotzea izango litzateke, dantzak kalera ateraz; bigarrena, aipatutako transmisioa litzateke eta azkena, auzolana, azken batean, bolondresen lanak ere garrantzia duelako gure historian".
Gauzak horrela, nortasuna, transmisioa eta auzolana izango dira 50. urteurrenaren hiru ardatzak.
Urteko egitaraua
50. urteurrenaren baitan, Oñatzek urteko egitaraua antolatu du eta hilabete bakoitzean gai bat jorratuko da. Urtarrilekoa, esate baterako, Oñatzen historian oinarrituko da eta horren harira, solasaldia egingo da urtarrilaren 22an, 19:00etan hasita, Gaztelekuan. Gauzak horrela, urteko gaietako batzuk, inauteriak, Korpus eguna edota haurren eguna izango dira.
Udalaren eskertza
Izaro Elortza, Oñatiko alkateak ere hitza hartu du ekitaldian eta Oñatzi 50 urte hauetan egindako lana eskertu dio eta horrekin batera, dantza taldeko kideak orain arte bezala lanean jarraitzeko animatu ditu.
Soka dantza
Prentsaurrekoa amaituta, Oñatzen 50 urteen historian parte izan diren 50 pertsonek soka dantza egin dute plazan eta herritar ugari gerturatu dira dantza ikustera.
