Hitzaldi eta ekitaldi guztiak Oñatiko zine aretoan izango dira, 19:00etan. Hona hemen:
Urtarrilak 14, martitzena
- Iñigo Larramendi: Gasteiz 1200: Martin Ttipia auzolantzerkia
Egungo Euskal Herriaren konkista Gasteizeko bederatzi hilabeteko setioaz hasi zen, 1200ean. Martin Ttipia elkartekoek, hiriko dantzari eta abeslariekin elkarlanean auzolantzerkia egin zuten 2017an, leku hartako memoriaz jabetzeko. Aurrez, memoriak nortasuna eraikitzeko duen funtzioaz jardungo du Larramendik.
Urtarrilak 21, martitzena
- Beñi Agirre: Gipuzkoako historia nafarra liburua
Egungo Gipuzkoa ikuspuntutzat hartuta, kontextu zabalaz jardungo du Agirrek, Nafarroaz eta Gaztelaz. Perspektiba horretatik Gipuzkoaren historia beste era batera interpretatuko du.
Otsailak 4, martitzena
- Joseba Asiron: 1512ko konkista
Garai berrietarako haziak landatuta zituen erreinua nola errotik erauzi zuten kontatuko du Asironek. Proiekzio humanista garbia zuen kultura nola laino ilunek estali zuten. Eta nola etxekoek ere etxekalte egin zuten, elkarren arteko liskarretan lehenik eta espainolen aliatu gero.
Otsailak 11, martitzena
- Asisko Urmeneta: 1620 Nafarroa beheregaina komikia
Ilustratzaile eta agitadore ezagunak komikia atera berri du Nabarralderekin, Nafar Erresumaren azken hatsak jasotzen dituena. Hori aitzaki hartuta, Pirinioz gaindiko Nafarroaren bilakaera kontatuko du Urmenetak.
Martxoak 10, martitzena
- Ekain Martinez de Lizarduy: Erraiak dokumentala
Kobazuloetatik datorkigun oihua. Entzun, sentitu eta kantatu egiten duguna. Hitzik gabeko hizkuntza. Erraietatik ateratzen zaiguna. Arbasoen oihartzuna. Baina noiztik dugu irrintzia gure artean? Bizirik jarraitzen al du XXI. mendean? Hauek eta beste hainbat galderen erantzuna bilatzen duen ariketa da Erraiak dokumentala.