Gizakiak bere ingurunea izendatu egiten du eta hizkuntza du horretarako bitartekoa. Leku-izenek gizakiaren bizimoduaren berri ematen dute eta inguruan ohikoak diren osagaiez osatuta daudenez, garaian garaiko nahiz lekuan lekuko giza-talde bakoitzak bere inguruneaz egindako interpretazioa ezagutzeko aukera ematen dute. Toponimoak beraz, ingurunearekin zuzenki loturik daude eta ingurunea eraldatzean, hiztunak desagertzean, nahiz hizkuntza batek bestearen lekua hartzen duenean, denboran irauten duten lekuko azkenak dira.
Eta ikuspegi horretatik, toponimia oinarri hartuta, egingo dute irteera bat zapatuan Aizkorri-Aratz parke naturalean. Luis Mari Zaldua onomastikaria izango da gidaria eta parketxetik abiatuko dira, 09:30ean. Zailtasun ertaineko irteera izango da, denei zuzendutakoa; hiruzpalau orduko iraupena eta bost kilometro eta 300 metro inguruko desnibela.
Irteeraren prezioa da bost euro eta joan gura duenak aurrez eman behar du izena. Horretarako bideak dira: 943 78 28 94, 699 335 183 edo arantzazu@gipuzkoamendizmendi.net.