Eskola jasangarria ziurtagiria jaso du astean Txantxiku Ikastolak Urdaibaiko Madariaga dorretxean egindako ekitaldian. Iñigo Urkulluren eskutik jaso zuen saria Itziar Aranak, ikastolako zuzendariak.
Ingurugiroarekin duen konpromisoa saritzen du kalitate ziurtagiri honek eta horretarako ikastolak egin duen lana errekonozitu. Lierni Axpe ikastolako langilearen esanetan natur inguruari lotutako plangintzek euren pisua dute sari honetan: "Adibidez, Agenda 21 ekimenean guraso talde propioa dugu, ortua dugu eta curriculumean sartuta dago, tuperren edo ontzien erabilera sustatzen dugu, Imika planaren bidez egiten dugu komunikazioa eta oso paper gutxi erabiltzen dugu". Baina lan egiturak ere jasangarritasunarekin lotura duela dio Axpek eta hori ere erakutsi dutela: "Lankidetzan, hezkidetzan oinarritzen da, besteak beste. Kooperatiba bat gara eta erabakiak geuk hartzen ditugu, guztion artean. Konfiantzaren pedagogiak ere badu lotura... Hori guztia jaso genuen txostenean".
Ziurtagiri honekin batera hobetzeko proposamenak ere jaso dituzte. Lau urte barru berriztu beharko dute ziurtagiria eta horretarako lan egingo dutela adierazi du Axpek.