Idoia Lazpita udaltzainburuak baieztatu duen moduan, bezperan, zapatua, joan ziren Oñatiko udaltzainak Arantzazura eta ordurako aparkatzeko toki gutxi zegoela ikusi zuten. "Aparkalekuen ehuneko handi bat ordurako beteta zegoela ikusi zuten zapatuan; erdiak baino gehiago autokarabanak eta karabanak ziren. Ertzaintzak abisua pasa zigun esanaz aparkalekuak betetzen zirenean errepidea itxi egingo zutela, segurtasunagatik. Eta hala izan zen, aparkatzeko tokiak bete zirenean itxi egin zuten errepidea; 09:00etarako itxita zegoen", adierazi du Lazpitak. Eguerdian zabaldu zuten berriz.
Ibilgailua Oñatin aparkatu eta autobus geltokietara joan ziren asko. Egun horretarako (uztailaren 31n eta irailaren 1ean moduan) indartu egin zuen Oñati eta Arantzazu arteko autobus zerbitzua Oñatiko udalak, baina jende asko zegoen geltokietan zain eta ezin denak orduan garraiatu. "Gu esaterako postetxeko geltokian geunden zain, baina autobusa lehen geltokian, San Lorentzon, bete egiten zen eta ez zen postetxeraino heltzen. Hara ez zen autobusik etortzen. Azkenean San Lorentzoko geltokira joan ginen eta lortu genuen Arantzazura igotzea", dio herritar batek.
