Guztira, hemezortzi lagun elkartu dira Aloñan auzolana egiteko. Hainbat lan egin dituztela adierazi du Natur Eskolako Aimar Uribesalgok: "Urriko elurteak zuhaitz asko hondatu zituen eta kimaketa lanak egin ditugu, lan handia egon da arlo horretan; aurreko urtetan landatutako zuhaitz txikien ingurua zopisartu ere egin behar izan dugu, hau da, inguruko albitz-belarra kendu egin dugu, euri-ura samurrago har dezaten zuhaitzek; hesi batzuen mantenu lanak ere egin ditugu, elurteek, haizeak eta abereek denborarekin hondatu egiten dituzte-eta; azkenik, aurreko urtetan landatutako baina aurrera irten ez diren zuhaitzen lekuan beste batzuk landatu ditugu, guztira, hamaika lizar izan dira".
Goiza goibel samar hasi dutela ere gaineratu du Uribesalgok, lanbroarekin eta behe-laino nahiko itxiarekin hasi baitute, baina denborak aurrera egin ahala, euria gelditu eta lainoak zabaldu direla adierazi du. Tenperatura aldetik, nahiko epel egiten zuen eta bukatu orduko giro ona zegoela esan du Uribesalgok.
Egindako lanaren ostean, salda, txorizoa eta gazta jan dute bertako txabola batean.