2013an hasi ziren Oñatin Inauteri Zapatua indartsuago ospatzen. Oñatz dantza taldeak gidatutako ekimena izan zen arren, hasieratik gura izan zuten ekimen herrikoia izatea eta halaxe sortu zuten askotariko herritarrak batzen dituen Oñatiko Inauteriak taldea. Jaian parte hartu gura duten guztientzako ateak zabalik dituztela adierazi du taldeko Zuriñe Lazkanok: "Helburua ahalik eta herritar gehien batzea da, adin eta profil askotarikoak, eta dantzan trebea izatea ez da baldintza. Urtez-urte jende gehiago batzen gara; poztekoa da gaur hurbildu den jende kopuru polita ikustea. Aurreko urteetan izandakoak badaude baina lagun berri askok eman dute izena aurten, horregatik, gaur, zapatua, bi taldetan banatu gara, hasi-berriak, batetik, eta dantzak ikasiagoak dituztenak, bestetik. Hala ere, dantzan trebea ez denak, edo dantza egitea gustuko ez duenak, baina jaian gurekin parte hartu gura duenak pertsonaia moduan ateratzeko aukera ere badu".
Martitzenetan eta zapatuetan, Eltzian
Euskal Herriko beste toki batzuetako dantzak eskaintzen hasi ziren, baina orain dela hiru urte dantza berriak sortzen hasi zirela gaineratu du Lazkanok: "Lagun-talde bat elkartu ginen eta hainbat adituen laguntzarekin, egun horretarako Oñatiko dantza berriak asmatzea polita izango zela pentsatu genuen; hortaz, euskal dantza ezagunetako pausuak oinarri hartuta, bost dantza eta bi kalejira osatu genituen. Astean birritan elkartuko gara horiek ikasteko: martitzenetan, 20:00etan, eta zapatutan, 12:00etan. Animatu eta etorri gurekin, oso egun polita izaten da!".
