Hots Abesbatzak 'Angelus' kontzertua eskainiko du egubakoitzean Arantzazun

Hots Abesbatza.

Gabon garaian ohitura bihurtu den hitzordua izango du Hotz abesbatzak urtarrilaren 4an. Arantzazuko santutegian 19:00etan eskainiko duten kontzertua "sorpresaz beterik"datorrela iragarri dute, besteak beste, Amaia Albes diseinatzailearen kolaborazioa. Sarrerak dagoeneko salgai daude 10 eurotan eta Arantzazura joateko autobus zerbitzua ere egongo da.

Hots Abesbatza Oñati eta inguruko herrietatik datozen ia 40 emakume eta gizonezko batek osaturiko taldea da. 2016ko irailean hasi zuen ibilbidea Aitor Biain Bidarte zuzendariarekin eta pixkanaka garrantzia hartzen ari da abesbatzen munduan.

Gabonetako kontzertua

Lehenengo zatian, a cappella zein pianoz lagunduriko hainbat autore entzutetsuren lanak taularatuko dituzte, hala nola, J. Busto, K. Sato, E. Ugalde, F. Ibáñez, D. Andreo, J. Elberdin, P. Casals eta O. Gjeilo. 
 
Bigarren zatian berriz, Giovanni Battista Pergolesiren Stabat Mater obra ospetsuaz bere osotasunean gozatzeko aukera izango dute bertaratzen diren guztiek. Hots Abesbatzaz gain, bakarlariak eta ganbera-oskestra ere arituko dira. 12 zenbaki edo mugimenduz osaturiko obra hori Pergolesiren lan erlijioso ospetsuena da. 1736an konposaturiko pieza hau jatorriz, soprano eta alto bakarlarientzat, bi biolin, biola eta basso continuo-rentzat idatzia dago.
 
Pergolesik bere tuberkulosi gaitzaren azken egunetan idatzia dela esan ohi da, 26 urte zituenean, Pozzuolin (Napoli, Italia) dagoen Frantziskotar monasterio batean. Hori idazten bukatu eta berehala hil omen zen. Ez dute Arantzazuko Santutegia baino toki egokiagorik bilatu lan hau taularatu eta bere jatorrira itzuliz, denboran mende batzuk atzera egiteko.
 

Amaia Albesen diseinuekin oholtzara

Hots Abesbatzak eskainiko duen programaz gain, Amaia Albes diseinatzaile arrasatearraren ukitu ere izango du, berarena izan baita taldeak erabiliko duen uniformearen sorkuntza lana. Horiek estreinakoz ikusteko aukera egongo da Angelus kontzertuan.

Abesbatzaren hitzetan, Amaiaren filosofia, taldearen izaerarekin bat dator, "emakumea delako, eskuz lana egiten duelako, berritzailea delako, profesional ezin hobea delako, mimoz eta maitasunez josten dakielako eta lana txukun eta fin egiten duelako".

Autobus zerbitzua

Arantzazuko Santutegira igo eta jaisteko autobusa antolatu du taldeak, inor emanaldi honetaz gozatzeko aukera gabe geratu ez dadin. Autobus tiketak 2 eurotan salduko dira Oñatiko Txokolateixan. Autobusaren ibilbidea honakoa izango da: 18:15ean Korreos-eko geltokian; 18:20 Kalegoienako geltokian; 18:25: Olakuako geltokian. Itzulera 20.30etan.

Sarrerak aldez aurretik salgai daude 10 eurotan: Oñatiko Txokolaiteixan, plazako makinan eta www.oñati.eus atarian.