Diagnosia borobiltzeko bilera irekia egingo du EH Bilduk zapatu goizean

Prozesuaren gainean uztailean egindako balorazio egunean ateratako argazkia

'Harittu' prozesua abiatu zuenetik herriaren diagnosia egiteko ekarpenak jasotzen ibili da EH Bildu. Herritarren zein eragileen aldetik jaso ditu eta horiei forma eman, azken ekarpenak jaso eta diagnosia borobiltzeko, bilera irekia egingo du zapatuan, 10:00etan, gaztelekuan.

Kidegoa saretuz "EH Bilduko komunitatea osatzen joateko eta Oñatiren etorkizunerako herri proiektua marrazten joateko helburuarekin" jarri zuen martxan koalizioak 'Harittu' prozesua pasa den ikasturtean. Ordutik hona Oñatiko herritarrek izan duten parte-hartzea handia dela adierazi du EH Bilduk. "Hamarnaka eragile eta norbanakorekin hitz egiteko eta iritziak trukatzeko aukera izan dugu denbora honetan, eta horri esker gure herriaren argazki nahiko osatua lortu dugulakoan gaude".

Fase honi amaiera emateko, tailer ireki batzuk antolatu dituzte zapaturako, 10:00etan, gaztelekuan. Bi helburu nagusi dituzte tailer horiek: "gure diagnostikoa herritarrekin partekatzea eta oraindik parte hartu ezin izan dutenek beren ekarpena egitea. Diagnostikoa borobildu eta amaitzeko baliatuko dugu saio hau, eta oñatiar guztiak daude gonbidatuta bertan parte hartzera".

Hauek izango dira ekarpenak egiteko landuko dituzten arloak: politika sozialak, lurralde antolaketa, sozioekonomia, berdintasuna, kultura, hezkuntza, euskara, gazteria eta kirola.

Bilera honekin amaiera emango diote diagnosi faseari eta ekintza plana zehazteko etapa abiatuko. "Bertan, egin berri dugun herriaren erradiografiatik abiatuz, Oñati eta oñatiarren beharrei erantzungo dien herri proiektu bat marrazteari ekingo diogu".

Erlazionatuak

'Harittu' prozesuaren orain arteko balantzea, ''erabat positiboa''

Oñati

EH Bilduk abian jarritako ekimenaren barruan,  dozenaka herritar ari dira parte hartzen  oraindik amaitzear dagoen diagnostiko orokorra e...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.