Pentsioen igoera "lotsagarria" salatzeko, Madriletik jasotako gutunak berriz bueltan bidaltzeko ekimena egin dute herriko pentsiodunek eta gaur eguerdian bidali dituzte Madrilera edukiontzietan jasotako gutunak. 545 gutun jaso dituzte herriko dendetan baina hainbat pentsionistek postetxean zuzenean utzi dituzte, hortaz, ez dakite zehatz zenbat izan diren bidalitakoak. Eta gaineratu dute: "Euren lankidetzagaitik esker ona helaraziko zaie dendariei gutun baten bitartez".
Postetxera joan aurretik elkarretaratzea egin dute Foruen plazan eta han adierazi dute protestekin jarraituko dutela. Hurrengoa datorren astelehenean, otsailaren 19an, izango da, 12:00etan, toki berean. Hala ere, protestak hiriburuetan egiteko aukera ere badagoela esan dute.
