Atzo, martitzena, 22:00etan egin zuten bilera Txantxiku Txuriurdinak lagunarteko zuzendaritzan dauden kideak. "Ez da ezer aldatu. Iñigo Martinez gure aita pontekoa zen eta hori galdu dugu, baina guk Reala animatzen jarraituko dugu, orain arte egin dugun moduan", adierazi dute lagunarteko ordezkariek.
Duela ia hiru urte sortu zen Oñatiko Txatxiku Txuriurdinak lagunartea eta hasieratik hartu zuten jokalari kuttun Iñigo Martinez. Golak sartu dituen aldiro xanpainaz eta Oñatin egindako gaztaz eta txakoliñaz osatutako otarra eman izan diote. Ohitura horrekin aurrerantzean zer gertatuko den galdetuta horretaz ez dutela hitz egin adierazi dute. Ezta aita ponteko berria izango duten edo ez.
Iñigo Martinez Realetik Athletic-era doala publiko egin ostean erabaki zuen zuzendaritzak bilera egitea. Ikusmin handia piztu du, gainera, batzar horrek. Komunikabide askotako deiak jaso zituzten atzo, bailarako eta herrikoetatik gainera, baita, esaterako, SER-etik, Antena 3-tik eta Cuatro-tik ere.
