Iruñeako Ezkaba mendiko San Cristobal presondegiko historia kontatu dute Oñatin

San Cristobal espetxeko artxiboetan ageri denaren arabera, 14 debagoiendar egon ziren preso bertan 1934 eta 1945 urte bitartean. Sei oñatiar, bergarar bi, Aretxabaletako lau, arrasatear bat eta Leintz Gatzagako bat. Atzo, Oñatiko kultura etxean egin zuen Koldo Plak espetxearen gaineko La memoria en una botella. El cementerio de las botellas delako hitzaldia. Txinparta-Fuerte San Cristobal elkarteko kidea da Pla. Taldearen helburua da, "San Cristobal Gotorlekuan errepresaliatuak izan zirenen memoria berreskuratzea".

San Cristobal espetxean erregistratutako 554 preso hil zituzten. Han hil zituzten beste 200, ez daude erregistratuta. Hain zuzen ere, Txinparta elkarteko Koldo Plak, Aranzadiko Paco Etxeberria auzi-medikuarekin batera, 131 preso hobitik ateratzeko lanetan hartu du parte. Bi elkarteek elkarlanean, erakusketa bat ere antolatu dute eta urtarrilaren 20tik 31ra bitartean egongo da ikusgai Oñatin. Lur azpitik lur-azaleratuz izena du erakusketak.

Memoria historikoa berreskuratzea

Ezkabako presondegiko historia azaltzeaz gain, memoria historikoa berreskuratzearen garrantzia azpimarratu zuen atzoko hitzaldian Koldo Plak. San Cristobal gotorlekuan lurperatutakoez egin zuen berba bereziki, eta azaldu zuenez, Aranzadirekin batera egindako lanetan, lur azpitik ia 50 gorpu atera dituzte senideei emateko.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.