Pakistani Immigration and Integration in the Basque Country: a Case Study of Oñati ikerlana aurkeztu du gaur Patara McKeen LSNEko master ikasle kanadarrak. Bere ikerlana Oñatin bizi diren etorkin pakistandarrei egindako elkarrizketa pertsonaletan oinarritu da. Besteak beste, identitatea, hizkuntza gordetzeko eta transmititzeko joerak eta jarrerak, legedia, europarrek –eta oñatiarrek– etorkinenganako dituzten jarrerak, genero rolak landu ditu McKeen-ek.
Aurkezpenaren amaieran, entzuten zeuden ikasleengana zuzendu da McKeen, eta esan die Oñati eta bertako Lege Soziologiako Nazioarteko Erakundea "leku bikainak" direla lege soziologian lehenengo pausoak emateko. Gaineratu du bere ikerkuntzak eta Oñatin egonaldiak "ikertzaile eta pertsona hobea" izaten lagundu diotela.
Oñatiko International Institute for the Sociology of Law-tik adierazi dutenez, jende "dezente" joan da defentsa entzutera; tartean, "McKeen-en Oñatiko lagunak, eta baita Oñatira iritsi berri diren aurtengo master ikasleak eta LSNEko zenbait arduradun ere". Horiez gain, Udaleko zinegotzi Irati Etxeberria eta Hezkuntza teknikari Iñaki Akizu ere bertan izan dira. Izan ere, tesia Oñatiko Udala Grant bekari esker garatu ahal izan du McKeen-ek.
Vincenzo Ferrari (LSNEko zuzendari zientifikoa ere badena) eta Dolores Morondo irakasleek 'B' nota jarri diote tesiari. McKeen gazteak onartu du "oso urduri" zegoela eta pozik hartu du epaia eta epaimahaiak eman dion txapela. Ikerlana argitara emateko asmoa agertu du gainera.
