Eskola Agenda 21eko proposamenak aurkeztu dizkiote ikasleek alkateari

Bilkura berezia izan da eguazten goizean Oñatiko osoko bilkuren aretoan. Mikel Biain alkateak Oñatiko hiru ikastetxetako neska-mutikoak hartu ditu Eskola Agenda 21 egitasmoaren barruan landu dituzten proposamenak jasotzeko. Biodibertsitatea eta natura izan dira gai nagusiak.

Biodibertsitatea, natura, ekosistema eta kale edo ibaien garbitasuna bezalako gaiak izan dituzte berbagai saioan. Ingurumenaren zaintza, azken baten. Goizeko hamarretan hasi dute bilkura eta bertan batu dira Oñatiko Txantxiku Ikastola, Elkar Hezi eta Urgain ikastetxeetako Lehen Hezkuntzako eta Bigarren Hezkuntzako ikasleak.

Proposamenak eta konpromisoak

Besteak beste animalia gaixo eta galduak zaintzeko aterpetxe bat egokitzea, kaleak zaintzeko eta jendeari zikina lurrera botatzen ez uzteko kanpainak egitea edo erretako basoak, larreak eta errekatako baldintzak  berreskuratzea izan dira ikasleek egin dituzten proposamenetako batzuk. Herrian zakarrontzi gehiago eta handiagoak ipintzea, eta zikin dauden errekak garbitzea ere proposatu dute ikasleek.

Bestetik, konpromisoa erakutsi dute, gutxi kutsatzeko, natura zaintzeko, norbere zaborra etxera eramateko, animaliak maitatu eta errespetatzeko, edo erreka garbiketen kanpainatan parte hartzeko.

Mikel Biain alkateak adi entzun ditu ikasleen proposamen eta konpromisoak eta udalak naturaren zaintzan lanean jarraitzeko duen asmoa berretsi du.

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.