Eltzia egitasmoaren proiektu arkitektonikoaren lehen zirriborroa aurkeztuko dute

Eltzia egitasmoaren proiektu arkitektonikoaren diseinu lanak  eltzekide-ei aurkeztuko diete datozen egunetan. Azken hilabeteetan Izaskun Legaristi arkitektoa ibili da proiektua egiten; orain, eltzekide-ekin kontrastatzeko unea iritsi da.

"Proiektu arkitektonikoaren lehen zirriborroa aurkeztuko diegu eltzekide-ei eta denon artean adoste prozesu bat hasiko dugu", azaldu du Johana Olabarria Eltzia egitasmoko dinamizatzaileak. Ze proiektu aurkeztuko duten galdetuta, zera dio Olabarriak: "Iaz proiektua bera definitu genuen; alde batetik, eraikin barruan egongo zena eta barruko funtzionamendua nolako izango zen, behintzat oinarri batzuk finkatu ziren. Horrez gain, eraikinaren barruan zer nolako ekimenak egingo diren definitu genituen. Izaskunek egin duena da han planteatzen diren ekimenak gauzatzeko zer nolako espazioak egon behar diren irudikatu", dio Olabarriak.

Aurkezpena eta kontrastea

Lau aurkezpen saio egingo dituzte, eta ondoren kontraste saioak.  "Batzarrak egiten ditugunean elkarte bakoitzetik ordezkari bat edo bi etortzen dira. Hala, taldeari proiektua aurkeztu ondoren, taldekide bakoitzak bere elkartean aurkeztuko du proiektua; taldean hitz egin, eztabaidatu eta proposamenak landuko dituzte, bigarren batzar baten proposamen horiek jasotzeko", esan du Olabarriak. Hamabost bat eguneko tartea izango dute eltzekide-ek euren elkarteetan eztabaidatu eta proposamenak aurkezteko. Apirilaren 28an, bateratze saioa egingo dute: saio horretan sormen, auzo, gorputz eta herri mugimenduko kideak batzartuko dira. Taldeen proposamenekin osatuko da proiektua, eta modu horretan benetan dauden beharrak hartuko dira kontuan. Ondoren, lehentasunak zehaztuko dituzte.

Saio guztiak izango dira 19:00etan, Eltzian.

  Aurkezpena          Kontrastea           
Gorputz Eltzia Otsailak 24 Martxoak 10
Herri Mugimenduen Eltzia       Otsailak 26 Martxoak 12
Auzo Eltzia Martxoak 4 Martxoak 18
Sormen Eltzia Apirilak 14 Apirilak 28
Bateratze saioa   Apirilak 28

 

 

Gorputz Eltzia taldean Oinatz dantza taldea, Andraitz (dantza afrikarrak egiten dituzte) eta Lagun Lekuko Yoga taldea daude, besteak beste; Herri Mugimenduen Eltzia talde orokorrena da: Euskal Memoriaren taldea, Txirrinka, Gurutze Gorria, Acesma... daude, esaterako; Auzo Eltzia taldean auzoko hainbat eragile daude, Lagun Leku eta Txantxiki, esaterako; Sormen Eltzian herriko sortzaileak daude. Eltziako erabiltzaileak 12 bat talde direla esan du Olabarriak.

Musika Eltzia

Bosgarren eltze bat ere badagoela azaldu du Olabarriak: Musika Eltzia. "Musika Eltzia aurreratuen dagoen taldea da. Musika Eltzeko obren esleipena kaleratuta dago, 349.000 euroko aurrekontuarekin. Bi fasetan egingo dira obrak, inbertsio ekonomiko handia suposatzen duelako. Asmoa da martxoa edo apirilean obrak egiten hastea". Akustika kontuetan adituak diren EKO eta Egaic Gasteizko enpresek egin dute proiektua.    
32 musika talde daude –ohiko taldeak, lau bat kidekoak– eta tamaina handiko beste hiru: Trikitxaranga, Lizargarate eta batukada feminista.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.