Arantzazu eta Oñati, Fiturren aurkeztu dituzten eskaintzen artean

Mankomunitateko ordezkariak Madrileko Fitur azokan

Aurten ere Oñatiko turismo eskaintzaren berri eman dute eguaztenean hasi eta domekan bukatuko den Madrileko Fitur azokan. Euskal Autonomia Erkidegoak bi eskaintza eraman ditu hara: Donostia 2016 eta Inaziotar Bidea. Bigarren eskaintza horretan erakutsi dute.

Eusko Jaurlaritzako, Aldundietako eta Azpeitiko eta Zumarragako udalen ordezkariarekin batera Debagoieneko Mankomunitateko garapen agentziako presidente Igor Ezpeleta eta turismo teknikari Ana Heriz izan dira Madrilen eskaintza horien aurkezpenean. "Gure bailararako oso garrantzitsua da EAEk aurkeztu dituen bi aukeretako bat Inaziotar Bidea izatea. Berez, lehendik ere ezagutzen genuen Hiru Tenpluen ibilbidea jasotzen duen eskaintza da, baina Manresaraino luzatzen dena. Horrek esan gura du Euskal Herritik harago, Aragoi eta Kataluniako herritarrengana ere iritsiko dela eskaintza hau eta haiek hona etorriko diren aukera zabaldu egiten dela", dio Igor Ezpeletak, Madriletik.

Arantzazura etor daitezkeen turistak bailarara nola erakarri da, orain, Mankomunitateak duen erronketako bat. "Gura duguna da turista horiek Oñatin bakarrik gelditu beharrean bailarako beste herrietara ere erakartzea, Debagoiena ezagutu dezaten", adierazi du Ezpeletan. Hori lortzeko lanean hasita daudela aitortu du Ezpeletak. "Bailarako turismo teknikari guztiekin batera ari gara lanketa hori egiten. Hemen dugun eskaintza zehaztu eta hori turistei nola helarazi ari gara aztertzen", zehaztu du.

Manresara

Inaziotar Bidea izeneko produktua eguazten arratsaldean aurkeztu zuten eta Loiolako Inaziok Azpeititik Manresaraino egin zuen bidea jasotzen du; 1522 urtean egin bidea da, hain zuzen ere. Gainera, aurten, bide honen lehenbiziko jubileuko urtea da, eta horrek Oñatira eta Arantzazura etor daitezkeen turista kopurua handitu dezake. Hala, Mankomunitateak garrantzitsutzat jotzen du turista horiek bailarara erakartzeko modua aurkitzea.

Txokolatea ere bai

Fiturren aurkeztu duten aukera horrez gain, Oñatiko beste turismo eskaintzen zabalkundea ere egingo dute aurten Azul Marino enpresaren bitartez. "Adibidez, txokolatearen historia, Arrikrutzeko espeleologia esperientziak, Aizkorri-Aratz parketxea eta pottokaleku", dio Ikerne Altube Oñatiko turismo teknikariak.

Erlazionatuak

Euskadiko stand-a, Fiturreko onena

Debagoiena

Euskadik Fiturren jarri duen stand-ak, azokako stand onenaren saria jaso du. "Zalantzarik gabe, stand hau euskal nortasunaren isla da, indartsua ze...
Ana Heriz: "Inaziotar bideak bultzada emango dio bailarako garapen ekonomikoari"

Oñati

San Inaziok 1522an egindako bidaia oinarri hartuta, Inaziotar bidea izeneko proiektu turistikoa aurkeztu dute Madrilgo Fitur azokan. Loiolatik hasi...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.