Oñatiko hiru udaltzainetako bi etxean dira eta bestea Donostiako ospitalean

Atzo Oñatiko barraken gunean izandako liskarrean zaurituta gertatu ziren hiru udaltzainetako bi etxean dira dagoeneko. Oñatiko Udal gobernuak aditzera eman duenez, "zauri arinak dituzte eta senda agiria atzo gauean jaso ostean, etxean dira". E.U. Legazpin bizi den bergararra eta A.U. arrasatearra dira bi horiek. Bestea, larrien zauritu zena, J.Z., Donostiako ospitalean dago, zaintza berezien unitatean eta bere egoera "egonkorra da larritasunaren barruan; gaua egonkor pasa du eta ez du konplikazio gehiagorik izan". Bestalde, Oñatiko Udal Gobernuak aditzera eman duenez, akusazio partikular gisa aurkeztuko da erasotzailearen aurka zabaldutako auzibidean.