Orain arteko Txokolateixia dendatxoaren parean, lehen Orbea txokolatea egiten zuten tokian zabalduko dute Txokolateixia berria. Denda bakarrik izan barik, baina, interpretazio zentroa eta museo txiki bat ere izango da.
Juanito Zahor
Datorren eguaztenean, hilak 16, inauguratuko dute lokala. Anton Azpiazuk gertutik jarraitu ditu lanak eta zabaltzeko ilusioz dago: "Txokolatea usaindu ere egin ahal izango da gero. Txokolatea egiteko behar diren osagaiak eta prozesu ezberdinen ostean osagai horiek hartzen duten forma, kolorea eta usaina ere ikusi eta usaindu ahal izango da hemendik aurrera. Izan ere, usain diferentea du kakaoak, esaterako, tostatu aurretik eta ostean. Gainera, hotzean edo berotan ere aldatu egiten da usaina eta hori guztia erakusteko moduan egongo gara orain. Pozik nago".
Txokolateixa berriaren erakusketa gelak 75 metro karratu inguru ditu eta era guztietako informazioa jasotzen du. Txokolateari lotua dena, noski. Esaterako, Oñatin garai batean egon ziren zazpi txokolate etxeen inguruko informazioa dago, argazki zahar eta guzti. "Ikusten da, adibidez, lehen denak egiten zutela txokolatea armadarendako. Kuriosoa da", dio Anton Azpiazuk. Txokolateak kirolean izan duen islaren adibideak ere badaude, esaterako, futbolean, txirrindularitzan, mendian edo saskibaloian. Produktu hori zinemarekin eta margoekin lotutako adibideak ere ikusgai daude eta baita lehengo kromo bildumak ere, Juanito Zahor ilargira joan zeneko bilduma, tartean.
Turismo bulegoarekin
Hemendik aurrera, baina, turismo bulegoarekin elkarlanean jardungo dute, kanpotik datozen bisitei txokolatearen berri emateko. Oinatur kooperatibarekin berba egin dute, dagoeneko. Ikastetxeekin ere hitz egingo dute, umeen bisitak antolatzeko. "Erakusleiho txiki bat ere badugu eta lehengo bidetik jarraituko dugu", gaineratu du Azpiazuk.
