San Martin eta Ugarkalde auzoetako bizilagunak izan dira lehenak hondakinak gaika batzeko materiala jasotzen: organikorako, errefusarako eta papererako kuboak, plastiko eta ontzi arinendako poltsa horiak, zalantzak argitzen lagunduko duen hiztegitxoa eta hondakin bakoitza zein egunetan atera behar diren gogorarazten duen imandun egutegia.
Horixe da banaketa orokorra, bakoitzak, baina, tokatzen zaiona hartuko du. Hau da, organikoa zintzilikarioetan aterako duten herritarrek, bi ontzi marroi jasoko dituzte eta papera eta kartoia atariko edukiontzian jasoko dutenek, ez dute kubo urdin txikirk hartuko, atariko ardura duen bizilagunak hartuko du atarirako edukiontzi urdin handia.
Materiala jasotzeko, Nortasun Agiria aurkeztu beharko du herritarrak, eta etxe horretan normalean hondakinak gaika sailkatuko dituenaren telefonoa ere eskatuko diote.
Astelehenetik, kiroldegian
Gaur, bihar eta etzi, ETEO eraikinean egongo dira materiala banatzen. Gaur, esaterako, San Martin eta Ugarkalde auzoetako bizilagunek jaso ahal izango dute. Bihar eta etzi, berriz, Olakua eta San Lorentzo auzoetan bizi direnek.
Astelehenetik aurrera, Bidaurretatik behera bizi diren herritarren txanda izango da. Bizilagun horiek kiroldegian jaso beharko dute materiala eta atarietan oharra jarriko du udalak zein kalek zein egunetan jaso behar duen jakiteko. Ordutegia gaurko bera izango da datozen egunetan ere: 10:00etatik 13:00etara eta 16:00etatik 20:00etara.
Auzoetako banaketa
Ekainaren 4a bitartean egingo dute banaketa; Zubillagako bizilagunek jasoko dute materiala egun horretan. Horiei, auzora bertara eramango zaie materiala eta adieraziko den lekuan jaso beharko dute. Gainontzeko landa auzoetara ere ekaina hasieran eramango dute gaur banatzen hasi diren materiala. Kasu horietan, banaketa, auzo alkateen bitartez egingo dute.