Etorkizunari begira, landa-paisaietan bizimodua irabazten dutenek bizi baldintza duinak izan ditzaten moduak bilatu nahi dituzte. Bide horretan proposamenak egitea bilatuko du proiektu honen hurrengo faseak, eskualdeko baserri-paisaietarako ekintza zehatzak mahai gainean jarriz.
“Oso nabarmena da baserri-paisaiek euskal kulturaren testuinguruan esanahi berezia dutela, bertako nortasuna, historia eta kulturaren oinarrizko elementu direlako, sinbolismoz beteak” gaineratu dute antolatzaileek.
Beraz, elementu bereizgarriak kontserbatu zein baserri-paisaien balioa agerian jartzeko ekintza aproposenak identifikatzeko saioa burutuko da. Saio horren helburuak aurreko saioetatik ateratako ondorio nagusienak gogoratzea, ekintzen finantziazio modu berriak aztertzea, eta landa-paisaien balioa agerian jartzeko ekintzak lantzea dira. Saioaren ondoren, proposatutako ideiak sakondu eta eskualdeko administrazioei, eragile sozial eta ekonomikoei aurkeztuko zaizkie, hurrengo urteetan ekimenak gauzatzeko asmoz.
Beraz, apirilaren 18an, 19:00etatik 21:00ak arte, Aitzazabal Arantzazuko elkartean egingo den saio irekian parte hartzera dei egiten dute. Saioa bakarra izatea aurreikusten dute antolatzaileek eta eztabaida formatuan oinarrituko da. Parte hartzeko aldez aurretik konfirmatu beharko da paisaia.atl@paisaia.com posta elektronikoan edo 686 738 152 edo 943 335048 telefonoetara deituz.