"Berriak gara, baina saiatu gara jai egitarau ahalik eta parte-hartzaileena egiten. Horretarako batzarra egin genuen uztailean herritarren ekarpen eta ideiak jasotzeko. Orduko ideia batzuk sartu ditugu egitarauan. Adibidez, jai guneak deszentralizatu egingo ditugu, eta txosna gune bat egongo da Atzeko kalen". Hitz horiekin aurkeztu du Mikel Biain alkateak 2011ko jai egitaraua. 2012ko egitaraua prestatzeko udaberrian bilduko da jai batzordea. Jai egitarauko aurrekontua 186.000 euro pasatxokoa da.
Oharrak
Jaietan kontutan hartzeko hainbat ohar eman zituzten aurkezpenean. Alde batetik, zezenetan 16 urtetik beherakoek ezin dutela parte hartu gogorarazi zuten. Era berean, esan zuten txikiendako ez direla poni eta zezentxoak egongo. Beste alde batetik, Errosario egunean egingo duten ikuskizun piroteknikorako markatuko den perimetroa errespetatzea eskatu dute.
Jai parekideen alde
Berdintasun batzordeak indarkeria sexistari aurre egiteko bitarteko gisa, eraso sexistak atenditzeko zerbitzua jarriko du martxan. Jaietan 24 orduz telefonoa martxan egongo da eta indarkeria jasan dutenek aukera izango dute deitu eta artatuak izateko. Laguntza juridiko eta psikologikoa eskainiko dute. Aholkularitza eman eta zalantzak argitzeko ere balioko du. Jai gunean informazio puntua ipiniko dute eta telefonoa eskuratzeko aukera egongo da. Bestalde, leku horietan pegatinak eskuratu ahal izango dira.
Txosna gunea
Zapatuan, hilaren 24an hasiko dituzte jaiak txosna gunean. Txosna bakarra ipini dute karpa azpian eta sukaldea kanpoan. Sei taldek kudeatuko dute txosna: Oñatiko gazte independentistak, Oñati Zero Zabor taldeak, talde feministak, AHTrik ez! taldeak, OGAk eta Askatasunak.
Berrikuntzak ere badituzte, eta batez ere bi azpimarratu gura izan zituzten. Alde batetik, Errosaixo bixamonean egingo duten paella-jana indartzeko asmoz, mahaiak eta aulkiak ipiniko dituztela esan zuten. Txartelak zortzi eurotan salduko dituzte, Bogan, Onan eta Arranon. Beste alde batetik, edalontzi bererabilgarriak erabiliko dituzte. Euro baten truke salduko dituzte. Edalontzia itzultzen dutenek, euroa jasoko dute. Dena den, gura duenak etxeko edalontziak erabil dezake.
Bestalde, hilaren 28a Gaupasa Eguna izango da eta San Migel eguna Egun Morea.