Lasterkari kopuruari dagokionez probaren antolatzaile Xanti Mendiolak
jakinarazi du iazko kopurua mantendu egingo dela, hau da, guztira 270
korrikalari inguru. Horren harira, Mendiolak honakoa gaineratu gura
izan du: "azken orduan gorabeherak izaten ditugu lasterkari zerrendan,
eguraldia eta beste arrazoi batzuk direla medio". Debagoiendarrei
dagokienez, ibarreko 54 lasterkarik eman dute izena.
Eguraldia, oinarrizko faktore
Mendi lasterketetan eguraldia faktore garrantzitsua da, eta Aloñako
igoera ez da salbuespena. Euria eta hotzak lokaztu egingo du ibilbidea
eta Aloñako tontorretik behera jaitsiko dituzten 1.000 metroak
arriskutsuak izango dira. Eta gainera, probaren zeinu bereizgarri diren
ikusleei ez die mesede egingo eguraldi txarrak. Aloñako tontorrean,
korrikalarien zain, geldi eta bustita egotea ez baita oso gomendagarria.
Bero larregi ere ez da ona, lasterkarientzat batez ere. Lehenengo
edizioan gogor jo zuen eguzkiak eta lasterkariak oinak egosita heldu
ziren helmugara. Orduan hartu zuen Aloñako igoerak gogorraren fama.
Betiko ibilbidea
Proba Oñatiko plazan hasi eta plazan amaituko da, ohi moduan.
Ibilbideak ez du aldaketarik izango. Plazatik kanposatura eta handik
San Juan ermitara egingo dute lasterkariek. Hor, Arregirako bidea
hartuko dute eta Lamiategira jaisterakoan ezkerretara egin eta
Urtiagain (490 metro) izango dute helburu. Urtiagainetik gora malda
gogorrak izango dituzte aurren atletek: Belar (922 metro) eta Aloñako
gurutzea (1.288 metro). Igotzea gogorra da, baina proba ez da hor
amaitzen. Tontorra eginda, korrikalariek Uribarritik egingo dute
itzulerako bidea, Lezesarriko auzotik igaro eta San Estebango ermitatik
Oñatira jaitsiz.
Bestalde, Aloñako igoerako parte hartzaileak lau kategoriatan banatzen
dira: gizonezko seniorrak (18-44 urte), gizonezko beteranoak (45
urtetik gora) eta emakumezko beteranoak (40 urtetik gora).
errekorra, zincaren eskuetan
Ionut Zinca atleta gasteiztarrak ezarri zuen 2006an Aloñako igoerako errekorra: Ordu bat 13 minutu eta 23 segundo.
15,5 kilometroko luzera eta 2.200 metroko desnibela
Aloñako igoerak 15,5 kilometroko luzera dauka. Luzera, baina, ez da
lasterketa hain gogorra egiten duena. Izan ere, lasterkariek gainditu
beharreko desnibela da Aloñako igoera hain berezi egiten duena: guztira
2.200 metroko desnibel metatuari egin beharko diote aurre.
Ibilbidean korrikalariek sei postu izango dituzte edariak hartzeko, eta
hiru postutan eskuratu ahalko dituzte jatekoak. Horretaz aparte, hiru
kontrol izango dituzte ibilbidean zehar, nork bere denbora neurtzeko.