Egun honetako helburu nagusia gazteak herriko eragileetara gerturatzea eta parte-hartze aktiboa sustatzea zen. Horretarako My Way taldeak Donostian zehar ginkana erraldoi bat prestatu zuen. Bertan, Garapen Iraunkorreko bost helburu landu zituzten gazteek: Goserik ez, Etorkizuneko hezkuntza, Genero berdintasuna, Mugikortasun iraunkorra eta Belaunaldien arteko aliantzak. Helburu horietako bakoitza euskal eragile batek aurkeztu zuen eta tartean egon ziren, Hazi Fundazioa, Laboral Kutxa, Emakunde, Mugi, Matia Fundazioa edota Donostia Lagunkoia elkarteak besteak beste.
Egun osoan zehar helburu bakoitzarekin zerikusia zuten proposamenak landu ondoren, ginkanaren amaiera Kursaal jauregian izan zen eta bertan Txantxiku Ikastolako ikasleek egindako lana saritua izan zen.
Parte hartzaileen hitzetan “oso esperientzia ederra izan da eta oso pozik gaude gure lanaren emaitzarekin, ez genuen saria eramaterik espero!”. Eguna intentsoa izan zela aitortu dute, goiz eta arratsalde buru belarri talde lanean jardun zutelako helburuetako bakoitzarentzat proposamenak lantzen eta beste taldeen maila altua azpimarratu dute.
