Gurasook ere horretan guztian berebiziko garrantzia daukagu. Ezin dugu seme-alaben hizkuntza ohitura erabaki, baina asko lagundu diezaiekegu, eta, haurren ohituretan eragin nahi badugu, beharrezkoa iruditzen zait haurrak jaiotzen direnetik gure zenbait jokabide zaintzea.
Euskarazko hizkuntz ohitura sendotzeko, gurasook seme-alabei euskara aberatsa eskaintzea oso garrantzitsua dela uste dut, euskararekin bizipen positiboak eskaintzea eta, noski, gurasook hizkuntzari dagokionez eredu izatea.
Baina nola eskaini hizkuntza aberatsa? Abestiez baliatuz, ipuin kontaketak bultzatuz, irakurzaletasuna sustatuz… era ludikoan, jolasaren bidez. Horrek guztiak lagunduko die hizkuntza aberatsa izaten eta erabileran erraztasuna eta erosotasuna emango die.
Hizkuntza aberatsa lortzeko lanketarekin batera, gure seme-alabei jostailuak, jolasak, eskola orduz kanpoko jarduerak, telebista … euskaraz eskainiz eta erreferente euskaldunak eskaintzen badizkiegu, bizipen positiboak izatera lagunduko diegu eta euskara askorekin eta asko erabiltzera ahalbideratu.
Horrekin lotuta gurasoak hausnarketa bat egitera animatzen ditut: zeintzuk izan dira zuen seme-alabek azken hilabeteetan izan dituzten esperientzia positiboenak? Zein hizkuntzatan izan dituzte? Argi dago gaztelerarekin harremana ziurtatuta dagoela, baina euskararekin? Hemen bakoitzak zer egina badaukagula uste dut; beraz, hauxe egitera animatzen zaituztet.
