Urruntze soziala / Distantzia fisikoa

Erabiltzailearen aurpegia

Seguru nago pertsona bati baino gehiagori niri gertatzen zaiona gertatzen zaiola: "urruntze soziala" entzuten dudanean, atsekabez entzuten dut, min ematen dit… ez dut ulertzen nola modan jarri den adierazpen hori. Eta, kontuz, egunero entzuten dugu gizartea zuzentzen duten pertsonen ahotan; eta herriaren adierazpen arrunt gisa zabaltzen da.

Urruntze soziala, gizarte arrakala, egoismoaren, harrokeriaren, xenofobiaren, homofobiaren, injustiziaren, aukera-desberdintasunaren, eta abarren ondorio da, eta, beraz, zentzugabekeria da urruntze soziala proposatzea.

Pentsatzen dut pertsonen arteko urruntasun fisikoa –1,5 metro edo 2 metro– dela esan nahi digutena, eta halaxe proposatzen digutena, guztiz bestelakoa.

Pentsatzeko eskatzen dizut, mesedez, eta, ondo iruditzen bazaizu, zure hizkuntza moldatu eta zure inguruan komunikatu.

Hitzak sortzaileak dira: zerbait ez da existitzen izena jarri arte; eta gero, hitzek gure pentsamendua adierazten dute eta moldatu egiten dute.

Iruditzen zait ezen, kalera irteten garenean, aldendu egiten garela, ez distantzia fisikoa gordetzeko bakarrik, baizik eta, badaezpada ere...; ezezagunekin begiradak gurutzatzeko beldurra izango bagenu bezala, kalean ezikusiarena eginez.

Urruntze soziala sortzen ari gara, distantzia fisikoa gordetzeaz gain.

Pertsona ausartek esaten dute krisi hau une aproposa dela gizarte-eredua aldatzeko, mundu hobea lortzeko. Urruntze soziala sustatzea eredua aldatzea da, eta, gainera, eredu zentralista, poliziala-eta bada, konturatu gabe egoera berri batean sar gaitezke, baina ez da bilatzen eta irrikatzen duguna.

Mundu hobe baten alde.

----------

Pedro Etxebarria

Erretiratua

Aretxabaleta

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.