Bergarako HAPO bera betetzen ez duen egitasmoari 3 milioi euro bideratuko dizkio Eusko Jaurlaritzak. Enpresak Udalean aurkezten duen eskaera industria lizentzia da, baina hondakinen tratamendua, berez, ez da aktibitate industrial. Horrek guztiak, ordea, bost axola dio Eusko Jaurlaritzari, haren arazoa baita zein irtenbide eman 155.060 tona hondakin industriali; baserri baten ondoan, auzo batetik gertu eta Bergarako hirigunetik kilometro batera erreko badira ere.
Horrek ekarriko lukeen kutsadura ez da gutxiesteko modukoa; izan ere, urtero milaka tona ke eta ur kutsatu jaurtiko ditu; eta horrekin batera, era guztietako toxina eta metal astunak; esaterako, furanoak, dioxinak, merkurioa, beruna, sufre dioxidoa eta abar.
Eta hau gutxi balitz, Tapia legea asmatzen dute udalerriei euren lurren gaineko erabakitze ahalmena lapurtzeko, herritarren nahien, erabakien eta beharren gainetik enpresa kutsakor eta kaltegarrien interesak hobesteko.
Debagoieneko Alternatibak horrelako egitasmo suntsitzaileak eta herritarren osasun zein ingurumenaren kalterako diren proiektuak borrokatuko ditu. Era guztietako hondakinen murrizketa da bidea, eta ingurumenaren zein pertsonen kalterako ez diren hondakinen tratamenduak bultzatu behar dira.
Igandean Bergaran egingo den manifestazioak horrelako proiektu suntsitzaileak gerarazteko beste urrats bat izan behar du.
----------
Piter Encinas
Debagoieneko Alternatiba
Debagoiena
