Udal kudeaketa beharrezkoa da, inork ez du kontrakorik esaten, baina nire galdera da: kasu gehienetan, udal erabakiak zergatik ez dira joaten parte-hartzearekin batera? Batez ere, udal hauteskundeetan politikari batzuei ahoa betetzen zaielako parte-hartze hitzarekin.
Proiektu gehienak paperean oso politak geratzen dira, ez dago zalantzarik, baina proiektua bukatuz gero zauriak ikus daitezke; horretxegatik, gai hori agertzen denean, galdera hauek etortzen zaizkit: zein proiektu, zertarako, herriari zein ondorio ekar diezazkioke? Oso erraza da herritarren dirua gastatzea eta, aldi berean, herriaren arazoak konpondu gabe lagatzea.
Araba etorbidearen proiektua, benetan, zertarako da? Uste dut bidegorriarena aitzakia hutsa dela. Bidegorri proiektu landu, funtzional eta praktiko baten alde baldin badaude, zergatik ez dute lantzen Etxaluzetik kiroldegiraino bidegorriaren proiektua? Berriz, helburua autoak erosoago eta hobeto aparkatzeko baldin bada, ederto! Orduan, olagarro onartzen da maskota bezala.
Gai honen gako nagusia naturarekiko kontzientzia gabezia da; gehienetan, porlana edo asfaltoa naturari nagusitu zaio; proiektu honetan, 60 ezki zerrauts bihurtu dituzte, bi zedro erraldoi moztu dituzte, eta ziur nago hori ez dagoela bukatuta.
Porlanak inoiz ez du emango zuhaitz horiek ematen zuten onurarik: txorientzat babesa, oxigenoa, zarata gutxitu, itzala sortu... gero eta hurbilago gaude Mordor bihurtzeko.
----------
Piter Encinas
Ekologista
Arrasate
