Astelehenean ekingo diogu, ilusioz, pauso berri bati: Haurren aurrean, helduok heldu ekimenari. Umeen aurrean nagusiok euskara erabiltzeko ekintza-konpromisoa izango da oraingoan; hain zuzen ere, umeekin normalean haien denbora librean dabiltzan guraso, familiako, hezitzaile edota zaintzaileek haien artean euskaraz jarduteko ariketa egingo dute –umeekin ere bai, jakina!–. Nagusiok eredu izan behar dugu, umeek imitazioz guk egiten duguna kopiatzeko joera dutelako. Euskal hiztunok komunitatea egiteko garaia dugu, euskararen arnasguneak sortzeko eta bertan eroso jarduteko, ohituraz euskaraz bizitzeko. Erabakia hartzeko unea da.
Eta hori bera da, hain zuzen ere, bi ekimen handik ere proposatu berri digutena, asteon, haien aurkezpenetan. 22. Korrikak eta Euskaraldiak leku beretik jo dute, eta mezua argia da bietan: HITZEKIN, hitz egiteari ekin, bada garaia, oraintxe da momentua...
Txokoan eta orokorrean aktibatzeko ordua dugu; hitzekoak izan eta hitz egiten hasteko erabakia hartu, aktibatu eta gure inguruan egunero eragin. Bakoitzaren erabakia da, bakoitzak egin dezakeen ekarpena; eta dudarik ez izan, ekarpen txiki askok ekarpen komunitarioa eragiten dute, eta olatua sorrarazten. Helduok helduz gero, umeak euskararen olatuan jolasteko aukera irekiko dugu.
