Euskal enpresari entzutetsu batek zioen balorea gehitzen duen operazio bakoitzeko, beste 200ek ez dutela balorerik gehitzen. Ekintzarako sekulako marjina dugu hor.
Enpresek lanean dihardute balorerik gehitzen ez duten baina gure ekonomia kaltetzen duten operaziook ezabatzen. Henry Fordek xahutzea esaten zion horri.
Zer ulertzen dugu lehiakortasunaz ari garenean? Bada, produktuak kostu egokian ekoiztea, etengabe prezioa, kalitatea eta eraginkortasuna hobetuaz, hau da, xahutzea ezabatuaz.
Hori talde lanarekin eta gestio adierazleekin egiten da, eta adierazle horiek betetzeko energia handia jarri behar da. Horri esker, bezeroari balore handiago kostu gutxiagorekin eskaini diezaiokegu.
Kontuan izanik administrazioak herrialde honetako enpresarik handienak direla, kontzeptuok arlo honetara ekarriaz, gutxiago gastatuaz herritarrei balore handiagoa ematea izango litzateke ideia. Horrek zergen jaitsiera ahalbidetuko luke, zerbitzuen lehiakortasuna etengabe hobetuz eta xahutzea ekidinez.
Hemen ez dut inoiz lehiakortasun eraginkorraren adierazleez hitz egiten aditu, baina, zergatik ez jarri halakoak administrazioetan ere. Hala, enpresekin alderatu ahal izango lukete, emaitzak analizatu.
