Niri dagokidan arloan ere, hezkuntzan, badago zer hobetu; izan ere, hezkuntza oinarrizko zutabeetako bat da genero eredu kulturalen transmisioan. Fatima Mernissi marokoar ikertzaileak zioenez, gizaki bat dagoen edozein tokitan, emakumeen eskubideen aurka doan arautegi ikusezina aurkituko dugu; qu'ida izenarekin izendatzen zuen indar hau. Guk, irakasleok, gure eremuko qu'ida honen kontzientzia hartu beharko genuke, egunerokotasunean etengabe eragiteko eta benetako eraldaketa prozesua ahalbideratzeko, ikusezina dena bistaratuz.
Orain arte aipatutako guztiak eremu ilunak dira, baina badago itxaropen izpirik ere. Gaur, DBHko bigarren mailako ikasleek, Euskarako ikasgaian, Gora teloia proiektua aurkeztu didate; taldeka antzerkigintzaren ezaugarriak ikasi eta Euskal Herriko historian esanguratsuak izan diren emakumeen inguruko bakarrizketak sortu dituzte. Elkarlan-sare honetan, SETEM taldearen eta Olatz Pagalday antzerkigilearen laguntza jaso dute. Gela laborategi bihurtu da, eztabaidatzeko, antzezteko, sortzeko eta esperimentatzeko tokia. Hala, hurrengo egunetan, Iratiren, Yeralen, Maialenen, Iñigoren eta gainontzeko guztien ahotik, garai bateko Grazianaren, Casildaren, Eulaliaren, Mauriziaren eta beste batzuen testigantzak jasoko ditugu. Antzerkiaren magiaren bitartez, ahaztutako zein ahantzarazitako emakume hauen aldarria zabalduko dugu Oñatiko kale, kantoi eta auzoetan zehar.
