Herritarrek uste dute ez dutela aukerarik politikan eragiteko. Arantzazulabek eta Euskal Autonomia Erkidegoko hiru unibertsitatek eginiko ikerketa baten emaitza da. Ia denak ados gaude demokrazia dela sistema politiko egokiena, baina hirutik bik uste dute sistema politikoak ez duela inongo botererik jartzen herritar arruntaren esku. Lau urtean behin botoa eskatzen zaigu ordezkariak eta agintariak aukeratzeko, eta besterik, ia ezer ez. Etsigarria da ondorioa.
Enpresa multinazional eta komunikabide handiek –botere finantzarioak–, haiek bai, badute eragina, eta ez nolanahikoa. Ate birakariak, lobbyak eta alderdien finantzaketa, arautua edo ez-arautua, baliatzen dituzte legeak eta erabakiak euren interesen aldekoak izan daitezen.
Zein da herritarron boterea? Aktibismoa, konpromisoa, desobedientzia. Ez dira falta auziak. Klima aldaketa, ingurugiroa, pobrezia, immigrazioa, sindikalgintza, euskara, eskubide politikoak... Mobilizatu, iritzi publikoan eragin eta indar nahikoa eginez gero, erabaki politikoak baldintzatu.
