Meteoritoa dator zuzen

Erabiltzailearen aurpegia Miren Josu Arrazola 2022ko ots. 18a, 07:37

Jar gaitezen gora begira. Azken egunetako albistea da. Greenpeace erakundeak salatu du. Europan negu honetan 100.000 hegazkin ibiliko dira airean, bidaiaririk gabe, ibilbideen eta ordutegien gaineko eskubideak ez galtzeko. 2 milioi tona CO2 isuriko dituzte atmosferara, Europak ezarritako baldintzak betetzeko.

Beste bat: Txinako Neguko Olinpiar Jokoetan erabiltzen ari diren elur guztia, den-dena, artifiziala da. Antolatzaileek esan zuten 180 milioi litro ur erabiliko direla, baina, beste iturri batzuen arabera, 2.000 milioi litro ur beharko dira. Eta pentsa elur hori sortu eta mantentzeko behar den energia.

Orain, gasa eta energia nuklearra energia berde izendatu ditu Europak. Ez dira garbiak eta horrek, gainera, energia berriztagarrien garapena oztopatuko du, berriztagarrietara
bideratu beharreko
inbertsioak gas eta energia nuklearra ekoiztera bideratuko direlako.

Nolanahi ere, energia garbien inguruan ere zalantza asko daude. Energia eoliko eta eguzki energia instalazioek paisaia suntsitzen dute, eta ekosistemak larri kaltetzen dituzte. Ez hori bakarrik, mineral kritikoak behar dituzte eta, gainera, produzitzen duten energia jarioa ez da etengabea eta egonkorra, erregai fosiletatik datorrena bezala.

Munduko erakundeek eta gobernuek goi bilerak eta adierazpen potoloak egiten dituzte klima aldaketa geldiarazteko, baina euren jardunean denek dute xede hazkundea, kosta ahala kosta. Eta ez da posible 7.800 milioi pertsona bizi diren planetan etengabeko hazkundea.

Klimaren aktibistak aspaldi ohartarazten ari dira: ezagutzen dugun bizimodua aldatu egingo da. Aldaketa hori era antolatuan egin beharko litzateke, desazkundearen bitartez. Aldiz, ez badugu ezer egiten, askoz larriagoak izango dira ondorioak eta, beti bezala, zaurgarrienek sufrituko dute gehien. Ez dago irtenbide magikorik, eta zuzen dator meteoritoa.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak