Aldi berean, sareak gune demokratikoa ere badira, edonork parte hartu dezakeen aldetik. Badira bizpahiru urte Twitterren nabilela. Ez naiz erabiltzaile osoa, ez baitut ekarpenik egiten. Baina egunero sartzen naiz eta orduak ematen ditut, batez ere informazioa eta albisteen analisia jasotzeko. Baliagarria zait oso, baina ondorio txarrak ere ekarri dizkit. Aspaldi honetan askoz liburu gutxiago irakurri ditut. Eta susmoa daukat testu trinko, konplexu eta luzeak irakurtzeko adorea eta kontzentrazioa murriztu zaizkidala. Aldaketa horretaz jabetu naiz, behintzat, eta erabakita nago Twitterren erabilera neurtu eta lehengora itzultzera. Hausnarketa horretan nabilela, beste plataforma baten berri izan dut: Twitch, komunikazioaren mundura iritsi den azken berrikuntza. Ameriketako Estatu Batuetako hauteskundeetan garrantzi nabarmena izan omen du, gazteengana errazago heltzeko, freskotasunez, umorez... Eta Black Lives Matter mugimendutik ere erabili dute, komunikabideek errealitatea moldatu ez dezaten. Izan ere, betiko komunikabideetatik ia guztiz deskonektatuta daude gazteak, eta urrundu besterik ez dira egingo komunikabideak ez badira egokitzen garai berrietara. Nik egunotan pare bat liburu erosi ditut, hurrengo plataforma berriaren zain.
"Egundoko nazka ematen dit Torrak, baina ezin da alderatu demokraziaren oinarriak suntsitzen dituztenek ematen didaten nazkarekin...". Iñigo Urkullurena balitz bezala atera zuten txio hori duela gutxi Espainiako telebista kate batean. Iñigo Urkullu Lehendakari FAKE Twitterreko kontuarena zen, baina halaxe bota zuten, bi aldiz pentsatu gabe. Gero, akatsa zuzendu behar izan zuten. Twitterrek berezkoak ditu gezurra, manipulazioa eta eztabaida suntsitzaileak. Horrelako nahasmenak ez die mesede handirik egingo protagonistaren irudiari eta sinesgarritasunari. Baina, arriskuak arrisku, politikariak, alderdiak eta agintariak, denak daude sareetan. Eta ez diote uko egingo bitartekaririk gabe herritarrei zuzentzeko aukera ematen dien tresna horri.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak
