Euskal herritarren parte bat gara euskaldunon tribua, hau da, Euskal Herrian euskara hegemoniko izatea nahi dugunon komunitatea. Eta euskalgintzaren dema da identitate propioaren eraikuntzan euskararen hegemonia sustatzea.
Kasu batean zein bestean arrakastaren neurria da gehiengo zabalak lortzeko gaitasuna: Euskal Herria indartzen da jende askok euskal herritar izatea hautatzen duenean; eta euskararen egoera hobetzen da hegemoniara bidean askoren atxikimendu efektiboa irabazten duen neurrian.
Gauzak horrela begiratuta, bistan geratzen da zoru komunen eta egitasmo partekatuen garrantzia, agerikoa da barne konfrontazioaren gainetik –edo azpitik– lokarri sendoak behar ditugula herri garapenerako. Estaturik gabeko herrietan da beharrezkoen estatu politika. Hau ez genuke sekula ahaztu behar.
