Gaur, ostirala, Gasteizen egongo gara euskararen etorkizuna irudikatzen; edo, hobeto esanda, norabide horretan bi urtez egin den lanen aurkezpena eta sintesia egiten. Tartean, hitzalditxoa eskatu didate euskalgintzaren gainean. Eta titularrean aurreratzen dizuet azalduko dudan ideia argi bat: euskalgintza berria sortzen ari da, 50 urteko ibilbidearen lekukoa hartzeko eta biziberritze prozesuari astindu bat emateko.
Aro politiko berriak lagunduta eta gogoeta-lan sakonen ondoren, euskararen erakundeak –sozialak nahiz publikoak, eta Euskal herri osokoak– elkarri eskua emanda dabiltza lankidetzan, ekimenak elkarrekin pentsatzen eta bideratzen. Enpatiarako joera agerikoa da eta indarrak biltzea bihurtu da helburu nagusia, euskararentzat hegemonia esparruak irabazteko. Emaitza batzuk hasi dira bistaratzen, gehiago ere badator.