Euskararen biziberritze prozesuan, lan esparruan kokatu ohi da ikusi nahi ez den elefantea. Aldundian, behintzat, argi agertu da pakidermoa, euskalgintzarekin egin dugun partaidetza prozesuan. Eta, gaia lantzen hasi garenean, berehala topo egin dugu Fagor taldearekin, elefante ikusezinarekin.
Zortzi kooperatiba eta bost mila langile biltzen dituen taldean garatzen ari da, seguruenik, euskara laneko hizkuntza bihurtzeko esperientziarik aurreratuena. Egindako lanari esker urrats txiki asko metatu dira, eta jauzi handi baterako prestatzen ari dira.
Lehenik aitortza, eta bigarrenik lankidetza eskaini dizkiegu. Dagoeneko egin dutenak asko balio du; eta, lankidetza marko egokiarekin, biderkatu egin daiteke bere eragina. Jaurlaritza, Aldundia eta sektorea marko hori lantzen hasiak gara. Eta berrikuntza bilatzeko orduan, Fagor taldea izango da esperimentazio gune garrantzitsua. Debagoieneko elefantea bistaratzen hasi da.
