Ez daukat, ez, nire burua animalien babesletzat, ez behintzat babesle sutsutzat. Egia esan, zezenketak eta sokamuturrek izan litzaketen ikusgarritasuna, tradizioa eta 'artea' errespetatzen baititut. Eta horren aurrean, Oñatin sokamuturrik egin behar den edo ez iritzia emateko ausardiarik ez dut. Nahiz eta aitortu behar dudan niri traba pixka bat egiten didala, badakizu, goiko tabernetara joateko saihesbideak, edo saihes-kaleak hartu behar; hala ere jasangarria egiten zait...
Baina ezin dudana inola ere jasan eta sutan jartzen nauena zera da: bixamon arratsaldean kale Barriako establezimendu baten aurrean, sokamuturra zela eta zeuden babes-hesiei emandako erabilera. Lehen esan bezala, onar dezaket zezenen aurrean korrika egitea, errekorteak… Beste kontu bat da, ordea, hesi 'mugikorrak' erabiltzea zezena xaxatzeko, erasotzeko, eta okerragoa dena, arriskua sortzeko. Horiek bai 'ausartak'! Lagun multzo handia, hesiz babestua, zezen baten kontra. Hori ausardia!! Barkatuko didazue, baina lotsagarria iruditzen zait.
Badakit alkoholak emandako ausardia dagoela tarteko, baina horrek ez digu edozer egiteko baimenik ematen... Sokamuturra bai ala ez? Ez dakit, baina horrelakorik ez behintzat!
