Orain dela mende laurden, espazio-ontzi batzuek Ameriketako Estatu Batuetako hainbat hiri eraso zituzten, izpi deuseztatzaileen bidez. Ikusgarriak izan ziren irudi haiek: Etxe Zuria bera ere lehertu zuten! Jakina, film batez ari naiz: Independence day izenekoa. Baina ez dakit zergatik, halako analogia zoro bat irudikatu dut neure buruan, Ingalaterran Freedom day izendatu duten horren irudiak ikusi ditudanean. Azken estertorea iruditu zait, amaieraren hasiera handi bat baino gehiago. Are, nahiko nuke bigarrena ere fikzioa izatea, baina, tamalez, hango lehen ministroa isolatuta zegoen bitartean, Osasun ministroaren gertuko kontaktua izateagatik, milaka ingeles dantzalekuen jabe egin zen, maskara barik, inolako distantzia barik eta auskalo zenbat txertatu barik. Ze, gainera, gurean jada nahi ez dugun txertoa jarri dute ingelesek. Bai, AstraZeneca. Antza, guretzako ez da behar besteko ona eta soberan ditugunak garapenean diren herrialdeetara bidaliko ditugu; badakizue, pobreenak beti soberakinen zain. "Gu aberatsok", zioen Angel Errok Berria-n, Alemanian gertatu diren uholdeen harira hango emakume batek esan omen duelako: "Inork ez luke espero izanen Alemanian modu horretara hiltzea; herrialde probretsuagoetan espero dezakezu, agian, baina ez hemen".
Ikaragarria da zela urte eta erdi luze joan den arren, behin eta berriz hanka-sartze berberak egiten ditugun pandemia honetan. Iritsi da uda atzera ere, maskara kentzeko baimena eman digutelako hor gabiltza, zoroen pare, ez-jaiak ere ospatzen. Nork asmatu zuen ez-jaiak kontzeptua?! Galeretara, arren!
Esperantzara kondenatuak abesten zuen Garik. Onerako barik, txarrerako ulertu izan dut nik beti esaldi hori. Itxaropena izatea ona baita, mugiarazten gaituelako, baina kondenatuta egoteak badirudi esan nahi duela helburuak ez ditugula inoiz lortuko, eta horrek zapuzten nau.
Baina udan gaude, eta oporretan asko eta asko. Maskarekin bada ere, goza dezagun elkar maitatuz eta zainduz. Horixe da geratzen zaiguna, horixe gure esperantza… Elkar zainduz hobeak, akaso, ez, baina maitagarriagoak izango garelako. Uda on!
