'Offline'

Erabiltzailearen aurpegia Maddi Iñarra 2021ko urr. 8a, 00:00

Mendian harrapatu ninduen ni. Eguraldi eguzkitsu ederreko arratsaldea zen eta osteratxoa egitera atera nintzen. Udazkena izanik, betiere, poltsatxo batekin, perretxikoren bat aurkitzeko esperantzan. Arratseko argiak are ederrago egiten zuen paisaia berde urdina, eta –argazki zale amorratua naizen honek– ezin izan nion eutsi ikusten ari nintzena dokumentatu eta Instagramen partekatzeari. Noski, lehen lanpernekin topo egin nuenean ere, nire aurkikuntzatxoaren argazki bat perretxikozaleak diren pare bat pertsonari Whatsappez bidali nien. Bilaketarekin jarraitu nuen beste ordubetez edo, eta bat-batean konturatu nintzen inork ez zidala mezua erantzun, inork ez zuela nire argazkiaren aurrean erreakzionatu. Estaldura eskasa egongo zela edo jadanik hilabete horretako gigak agortuko nituela pentsatu nuen, baina etxera itzuli, wifira konektatu eta jakinarazpenik ez zela iristen ikusi nuenean, Twitterren sartu eta berehala baieztatu nuen susmatzen nuena.

Eta zu, nola ohartu zinen asteleheneko Whatsapp, Instagram, Facebook eta beste sare sozial batzuen erorketaz? Zenbateraino eragin zizun?

Gertaera haren biharamunean irakurri dut ikerketa baten arabera millennial-ak –teorian, 1981 eta 1996 bitartean jaiotakoak– "belaunaldi mutu" berria direla, telefonoz hitz egiteak antsietatea eragiten dielako. Millennial-ak eta horien ondorengoak diren Z belaunaldia, antza, email, txat edo foro bitartez komunikatzera ohitu dira; plataforma asinkronoak nahiago dituzte, ez dutelako interlokutorearekin denbora berean topo egiten eta esan behar dutena nahi adina aldiz pentsatu, ezabatu, idatzi eta berridatzi dezaketelako. Bideo-deiek ere antsietatea eragiten omen diete, beste pertsonaren aurrean filtro gabe agertzea eskatzen dielako.

Esango nuke gutariko askok gustatuko litzaigukeena baino gehiago erabiltzen ditugula sare sozialak; dibertitzeko, informatzeko, testuinguru jakin batzuetan geure buruaren irudi kalkulatu bat proiektatzeko... Hala ere, asteleheneko jazoeraren eraginez, pixka bat aspertzeaz harago, norbaitek bere lana –influencer dontsuen kasuan, adibidez– edo existentzia kolokan ikustea, kobertura izanda telefonoa hartu eta dei bat egiteko gai ez izatea...

Agian, zaharkiturik gelditzen ari naizen beste seinale bat da, baina ez nuke nahi gizarte honetako ezein belaunaldiri mundu eta harreman errealak aurrez aurre bizitzen ahaztea. Hori bai litzatekeela berrabiarazi ezinezko erorketa.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak