Eusko Jaurlaritzak jakinarazi du 2025erako hiriguneetara sartzen den trafikoa murrizteko neurriak hartuko dituela. Bergaran, aldiz, erdigunean aparkaleku berri bat eraikitzeko obrak hastea da gaur helburu nagusia. Seminarioko aparkalekua atzerapauso handi bat da mugikortasun jasangarriaren ikuspuntutik, erdigunera auto gehiago erakarriko dituelako, eremu horretan dauden trafiko arazoak areagotuz. Gainera, Udalak aurkeztutako Soinu Ingurua Hobetzeko Planaren aurka doa, zarata iturri berriak gehitzen direlako arazoak dituzten eremuetan. Kale trafiko gehien jasotzen dutenen artean dago, hain zuzen ere, Ibargarai kalea. Plan horretan bertan jasotako neurrien artean daude "disuasioaparkalekuak sortzea" eta "garraio publikoa bultzatzea", erdigunerantz auto gehiago sartzea ekiditeko eta horri lotutako zaratak gutxitzeko.
Aparkalekua egiteko, Aranzadi Ikastolako patioa obra eremu bihurtuko da denbora luzez. Eskola ingurune batean tamaina honetako obra bat segurtasun aldetik erronka handia da eta neurri bereziak aurreikusi beharko lirateke. Zulaketa lanek sortuko dituzten zarata eta bibrazioek irakaskuntza jarduera normal bat ezinezko egingo dute. Nola bermatuko du Udalak halako obra handi bat irakaskuntza eraikin batetik hain metro gutxitara egin eta Ikastolak bere egunerokoarekin jarraitu ahal izatea gutxieneko baldintza duinetan? Obrak hastear daude eta galderak airean.
Erdigunean aparkaleku baten premia oso errotuta dago herriko biztanle eta dendarien artean; aurkako iritzia azaltzea ez da politikoki zuzena. Hala ere, denok dakigu gertuen dagoen denda ez dela aparkaleku bat ondoan duena, eskuan klik batera dagoena baizik. Hiritarra erdian kokatzen duen mugikortasun planifikazioa egitera behartuta daude gure agintariak. Bergaran aparkatzeko arazoak konpontzeko bide bakarra erdigunera sartzen diren ibilgailuak murriztea da, oinezkoei, bizikletei eta garraio publikoari lehentasuna emanez, Bergara guztiontzat herri bizigarriagoa izan dadin.
----------
Larraitz Uribesalgo Urizar
Bergara
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak
