Ekonomia azken bi urteetako pandemiaren eraginetik irteteko egokieran zegoen unean, Europako erakundeek errekuperazioa bultzatzeko inoiz ez bezalako laguntza planak abian jarritako momentuan bertan, gerra sortu da Europa erdian. Sinesgaitza.
Berriki, Ekonomiako Lankidetza eta Garapenerako Erakundeko (ELGA-OCDE) ekonomialari-buruak, Laurence Boonek, adierazi du lehengaien prezioen igoerek eta finantza merkatuen gorabeherek, gerrak aurrera egiten duen neurrian, BEG globala, gutxienez, %1 jaitsiko dutela, Errusian krisi ekonomiko sakona sortuz, eta inflazio globala, gutxienez, %2,5 igoko dela. Zifrak oso gutxi gorabeherakoak dira; gerra luzerako badoa, eragina okerragoa izan daiteke.
Egoera horren aurrean, hainbat neurri hartzeko konpromisoak adierazi dituzte agintariek. Errusiaren energiarekiko menpekotasuna murriztea beharrezkoa izango da, baina horrek denbora eskatzen du. Laburrera, enpresek eta familiek beren kostuetan dituzten igoerak gutxitzera bideratutako neurriak hartzea beharrezkoa izango da, jarduera ekonomikoan, enpleguan eta kontsumoan gerraren eragina moteldu dadin. Prezioen hazkuntzari dagokionez, oraingoz, energiarena eta elikagaienak izan dira, batez ere, igo direnak. Gizarteko eta ekonomiako eragile guztien arteko ardura partekatua erabakigarria izango da, prezio hazkuntza horiek ekonomiako gainerako prezioetara ez bideratzeko bere horretan, inflazioa kointurala izatetik egiturazkoa izatera pasatu ez dadin. Hori lortzen bada, krisi ekonomiko sakona saihesteko aukeran egon gintezke. Baina horretarako, lehen baldintza gerra lehenbailehen amaitzea da.
