Zer da, baina, hizkuntza bat bere kulturatik aparte? Ozen aldarrikatzen dugu euskararen transmisioa euskal kulturaren transmisioarekin konektatu beharra, ezinbestean. Mundu berdindu honetan, herri izaten jarraituko badugu, konexioak egiteko erreferenteak behar ditugu historian eta mitoetan, literatura eta musikan, arte eta zientzietan, lan-molde eta ofizioetan, ohitura eta errituetan, eguneroko bizitzan eta ospakizunetan, entretenimendu eta kiroletan, sozializazio eta gobernantza moldeetan… Ia dena baita kultura, garaian garaiko tradizioz eta berrikuntzaz jantzia, collage bihurtuta ere, euskaratik interpretatzen eta adierazten ikasi behar duguna. Ikasi behar dugula diot, irakasleok, familiok eta herritarrok, oro har, galduta baititugu sarri konexio horietako asko. Pista asko aurkitu ditut Xamarren Biziaroak, herri kultura liburuan.
Eta pentsatu dut zein garrantzitsua den iragana ezagutzea, oraina ulertu eta etorkizuna imajinatzeko. Euskaratik eta errenditu gabe. Herri-begirada eta herri-adierazpena garatzen jarraitzeko.