Noski, testuinguru politikoan ez sakontzeko ahalegina dago Udalaren adierazpenen atzean, eta pintaketek, agitazio politikoaren baitan kokatutako ekintza diren neurrian, normalizazioak estaltzen dituen egoera bidegabeak indarrez azaleratzea dute helburutzat. Horren harira, hainbat hausnarketa egin nahi ditugu pintaketa horietako batzuk egin ditugun zenbaitek; izan ere, gure herrian normalizazio politikorako baldintzarik ez dagoela deritzogu.
Euskal Herriko 400 preso politiko baino gehiago daude oraindik, horien atzean gaixo larriak; eta guzti-guztiei erbesteratzea eta espetxe barruko sakabanaketa ezartzen zaie. Era berean, ehunka iheslari daude munduan zehar, oraindik Euskal Herrira itzuli ezinik. Gainera, hamaika epaiketa politiko abian dira, tartean Ino alkate ohia kartzelan sartzeko bat.
-Espainiak autodeterminazio eskubidea ukatzen digu euskaldunoi eta Estatuaren barruko gainerako herri zapalduei. Estatuaren mugak mantentzeko, Armada, Guardia Zibila nahiz gainerako poliziak zabaltzen ditu Euskal Herrian, lurralde hau Europa osoan biztanleko polizia gehien dituena bihurtuz.
-Espainiar Estatua, nahiz gure Autonomia Erkidegoa, ustelkeriak hartutako herria da. Demokrazia faltsu baten azpian, enpresa eta banketxeen aginpidea ezkutatzen da, erosita dauzkaten hainbeste alderdiren bitartez gauzatzen dena.
-Gudarien oroimena eta borrokarako deia zeharo kriminalizatua eta jazarria dago, horren froga dira urtero horren harira gertatzen diren sarekada eta atxiloketak.
Beraz, kontua ez da herrietako hormak politagoak edo zatarragoak diren margoketa eta aldarrikapen politikoekin. Pintaketak, agitazio politikoa eta borroka ezinbestekoak dira hemen eta orain, herri antolatua erresistentziarako eta borrokarako prest dagoela gogorarazteko, eta etsaiari ozen esateko ez dugula onartuko bake faltsurik. Gogoratu dezagun herri honek matxinatzeko eskubidea duela.
----------
Jone Uribe Etxeandia
Arrasate