Kontzentrazioa Gasteizen uztailaren 30ean

Erabiltzailearen aurpegia

Arabako Mendiak Aske elkartetik asaldatuta salatu nahi dugu Ingurumen Administrazioaren Legeari, Tapia Legeari, beste aldaketa bat egingo zaiola iragarri izana. Lege horrek ingurumen-eragina duen edozein proiekturen baimen-eskumenak gobernuan zentralizatzen ditu jada, eta, hala, beren lurraldeetako herri-lurren gaineko eskumena duten udalak eta kontzejuak salbuesten ditu.

Eusko Jaurlaritzak tokiko gobernantza kanpo uztearekin aski ez eta, orain, are gehiago urratzen du gobernuak berak lehentasunezko izendatutako proiektuek ingurumenean eragiten dituzten kalteak ebaluatzeko gaitasuna, ez baita beharrezkoa ingurumen-inpaktuaren ebaluazioa. Hau, diotenez, lurraldea pribatizatzeko orain arte planteatutako proiektuak arin izapidetzea lortzeko omen da. Enpresa energetiko transnazionalek gidatutako proiektuak.

Tapia andrea ausartzen da esatera horrek ez duela ekarriko ingurumen-eskakizunak eta -kontrola murriztea; orduan, zertarako aldatu legea? Ingurumen-afekzioen ebaluazio egokiaren prozesua ezin da alde batera utzi denboran zehar; orduan, nola betearaziko dituzue eskatutako ingurumen-eskakizunak eta -kontrola? Zein da zuen asmoa?

Une honetan mendilerro guztiak arriskuan daude. Natura-ondarea babesten duten legeak dinamitatzen ari dira autoritarismo-kolpe baten bidez. Kolpe horrek ahulezia-egoeran jartzen gaitu, eta ondorio atzeraezinak ekarriko dizkie gure herriko egungo eta etorkizuneko bizitzei.

Ezin dugu onartu salbuespen-egoera hori. Izapide hori alde batera utzi nahi bada, aurreikusitako proiektu horiek berez geldituko liratekeelako da, ez lukete gaindituko ingurumen-inpaktuaren ebaluazioa. Arrazoia ematen ari zaizkigu, nolabait, gure salaketak beti izan baitira aurreikusitako kokapenetan zentral horiek eragingo luketen eragin itzulezinak eragindakoak.

Aldaketa hori opor-sasoian iragartzen da, eta hori ez da kasualitatea. Horrela, gizartearen erantzuna saihestu nahi dute. Hain jarri dira enpresa energetikoen alde, ezen jada ez baitiete beren legeek ere balio. Horrek, besterik gabe, herrialde honen bilakaera erabakitzeko gai diren indarren oreka aldatu behar dela esan nahi du. Kolpe batez leherrarazten dute gure herrian ezarritako eta garatutako gizarte-gobernantza. Izan ere, antzinako gobernantza horri esker existitzen dira herri-lurrak.

Lurralde horretan bizi diren pertsonei nahita ezkutatzen ari zaie klima-aldaketaren larritasuna, egungo ereduari eusteak dakarren hazkunde mugagabeak eragina. Engainua dagoen energia-ereduari eustea justifikatzean datza, energiaren kostuengatiko gizarte-presioan oinarrituta. Hala ere, justifikaezina da ingurumena suntsitzea, hondatzen hasia den normaltasunari eusteko. Izatez, ondare natural honek salba gaitzake!

Energia berriztagarriak behar ditugu, gure lurraldearen behar eta gaitasunekin bat datozenak, ingurumenaren aldetik dagoeneko degradatuta dauden eremuetan. Pentsa dezagun, inflexio-une honetan urrats ausarta eman behar dugu denok batera, euskal gizarte gisa irautea ahalbidetuko digun eredua zein den pentsatu behar dugu. Benetan uste dugu horretarako lagungarri izango litzaigukeela epe laburrean etekina bilatzen duten nazioz gaindiko enpresetatik aldentzea.

Horregatik guztiagatik dei egiten diegu lurralde honetako biztanle guztiei eta lurralde hau maite duten guztiei, gure biziraupenerako hain erabakigarriak diren ondorioak dituen arbitrariotasun horren aurka egiteko. Hil ala bizikoa da mugimendu kolektiboan pertsonak inplikatzea. Esnatu gaitezen eta has gaitezen etorkizuna gure eskuetan hartzen.

Dei egiten dizuegu larunbat honetan, uztailaren 30ean, 12:30ean, EAJren egoitzaren aurrean, Andre Maria Zuriaren plazan (Virgen Blanca), egingo dugun kontzentrazioan erabaki horren aurkako jarrera adieraztera.

Babestu maite duzun mendia; Tapia Legeari ez!

----------

Judith Arriolabengoa Unzueta
 

Aramaio

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.