Argindarraren merkatua berezia da. Nuklearrak, berriztagarriek, enpresa hidroelektrikoek eta abarrek euren prezioetan egiten dute eskaintza, baina jakinda ordainduko dieten prezioa merkatuan dagoen garestiena izango dela; hau da, gasaren prezioan. Adibidez, arrandegi batean erosten badituzu txitxarroa, legatza, muskuiluak eta angulak, denak batera pisatuko dizkizute eta prezio garestienean saldu. Hau da, angularen prezioan.
Gobernuaren arrazoiak zentzuzkoak dira; enpresa hidroelektrikoak, bere garaian, diru publikoarekin egin ziren, eta beste gobernu batzuek argindar-enpresa handien eskuetan laga zuten planteatu dietena: hemen sortutako elektrizitatea ez dezatela gasaren prezioan kobratu. Baina Europa mailan legeak behartzen du horrela kobratzera; puntu honetan, Gobernuak esan die hortik sortutako irabaziak bideratu ditzatela elektrizitatearen prezioa jaistera. Beste borroka batzuk ere badituzte: Espainiako urtegi batzuen ur-maila larregi jaitsi da elektrizitatea sortzeko, eta horrek arazoak sortu dizkie inguruko biztanleei; kasualitatea ote? Edo argindar-enpresa handien beste trikimailuren bat da euren poltsikoak betetzeko?
Ez dakit Gobernuak ezer lortuko duen, baina zuk bai: ez erosi argindar-enpresa handiei, pasa zaitez kooperatiba energetiko batera. Ez naiz hau esaten duen bakarra: Facua kontsumitzaileen elkarteak ere esaten du.
----------
Josu Garitaonandia
Oparitu Zuhaitz Bat egitasmoaren arduraduna
Bergara