Adibide bezala, Bilboko Ingeniaritza Unibertsitatean maiatzean gertatu zen istripua komentatuko dizuet. Pertsona bat eskaileretatik erori eta koman egon zen uztailera arte, zendu zen arte. Kontua da orain dela urte batzuk antzerako istripua gertatu zela eskailera berean, eta neurri batzuk hartzekotan gelditu ziren; legea betetzeko egin beharreko hobekuntzak eskaileran. Saiatu naiz unibertsitatearen iritzia jakiten, baina nire galderak departamentu batetik bestera darabiltzate, erantzunik gabe. Badakizue, burokraziaren gauzak.
Hau unibertsitate batean gertatzen bada, gizartearentzako etsenplu eman behar duen erakunde publiko batean, pentsa zer ez den gertatuko lantegi pribatuetan. Hori bai, Osalan-eko arduradunak hau esan du: "Euskal gizarte modernoan ezin da langile bat bera ere hil". Lasai asko geldituko zen, baina estatistikek diote kontrako bidean goazela, iaz baino okerrago. Lehen zazpi hilabeteetan, Gipuzkoan, 8.633 lan-istripu erregistratu dira; hau da, 1.000 lan-istripu baino gehiago hilabetero, eta, zehazki, Debagoienean, hildako batekin.
----------
Josu Garitaonandia
'Oparitu zuhaitz bat' egitasmoaren arduraduna
Bergara
